Burada örnek olarak Mülk sûresinin ilk iki âyetinin tercüme ve tefsîrinin veriyoruz:
“1. Muhdesler sıfatından teâli ve teâzum itti ol Allah Teâlâ ki cemi-i umurun tasarrufu anın kabza-i kudretindedir. Öyle olsa her mü’mine layık olur ki anın vahdaniyetin tasdik ide. Ve herhalde ona tevekkül ide. Ol nef’ ve zarar ve ızz ü züll’den her şeye kadirdir.
2. Ol dünyada mevti ve ahirette hayâtı veya ikisin bile dünyada halk etti. Dinildi ki anınla murad insanın mevt ve hayâtıdır. Allah Teâlâ dünyayı dar-ı hayât ve dar-ı fena kıldı ve ahirette ise dar-ı beka ve dar-ı ceza kıldı. Ve mevti takdim itti. Zira ki ol kahra akrebdir, veya akdemdir. Zira ki eşyanın cemîi ibtidada mevt hükmünde idi. Ve nutfe ve türab ve emsali gibi. Badehü hayâtı i’raz etti. İbn Abbas ider: Allah Teâlâ mevti kebş-i aslah sûretinde halk itdi. Ol her ne şeye uğrayub ol şey anın kohusun bulduysa ona mevt irdi. Ve hayâtı feres-i bülgâ sûretinde halk itdi ki ona Cebrail aleyhisselam ve Enbiya rükûb iderlerdi. Ol her ne şeye uğradıysa ol anın kohusun bulduysa ana hayât irdi. İmdi mana; ey mükellefler Allah Teâlâ sizin mevtinizi ve hayâtınızı halk itdi. Liyeblüveküm, ta ki size teklifle mevt hayâtınızdan mevtinize değin muhbir muamelesi idüb ezelde sizden sudur idecek eşyayı bildiğin icadla size dahi bildire ki eyyüküm ahsenü amelâ, amelde kanğınız asvab ve ahlasdır. Veya aklda ahsendir. Veya mehârîmullahda evraʻdır veya taate esraʻdır veya dünyaya ezheddir. Ve hüve’l-Azîzü’l-Ğafûr, ol galibdir ki ahseni amelden iʻrâz idene intikâm ider ve iʻrazdan tevbe idene mağfiret ider.”